Overblog
Editer l'article Suivre ce blog Administration + Créer mon blog

Archives

Publié par La Tribune Franco-Rwandaise

Amagambo prezida Kagame yavugiye i Murambi taliki 7 Mata, 2007.

"UMUNTU YAJYAGA KUBAMARIRAMO RWOSE UMUJINYA

BAKAGIRA ICYO BAJYANA BAVANYE MU RWANDA"

Ijambo Perezida Paul Kagame yavugiye i Murambi taliki 7 Mata, 2007.

Banyacyubahiro mwese muri hano, harimo n’abashyitsi baje kwifatanya natwe hano;

Banyarwanda banyarwandakazi;

Baturage bo muri iyi Ntara y’Amajyepfo;

Reka mbasuhuze. Hanyuma nyuma yo kubasuhuza, ndibugerageze kuvuga amagambo make.

Nkatangira mvuga ko uyu munsi, kandi uhora uza buri mwaka, ubu bikaba bibaye ku nshulo ya 13, ni ngombwa. Ni ngombwa, usibye ko amateka nk’aya atakwibagirana gusa. Kuko yibagiranye twaba tutaravanyemo amasomo ahangije cyangwa ingaruka mbi nk’izo twabonye.

Kandi ni ngombwa ko kwibuka bihoraho kuko kwibagirwa byorohera benshi. Usibye ko kwibagirwa nubwo byorohera benshi bigatuma amateka asibangana, abantu bakaba basubira mu mateka mabi; bikurikiraho ko noneho n’abantu bakomeza umuco wo kwirengangiza ibibi, ndetse bigakomeza n’umuco wo gukora ibibi nkana. Ni ukuvuga rero ko kwibuka bizahoraho.

Binaduha n’umwanya wo kuvuga rimwe na rimwe byinshi bitagiyemo amarangamutima. Ubwo mu mirimo dukora y’ubuyobozi; mu buryo tubana n’amahanga, habamo umuco, umuco wo kuvuga ngo tugomba kunyura ibintu hejuru, ukavuga neza ntutoneke abantu, ntugire ute; uwo muco bamwe muri twe uratugora.

Kenshi hari n’ubwo tuvuga ibintu ugasanga n’abantu baje kutugira inama ko umuntu nka Perezida cyangwa se umuntu w’umuyobozi ko hari ibintu atavuga.

Ako kazi kazangora niba hari ibintu umuntu agomba kuvuga ntavuge, cyangwa akabivuga abinyura hejuru gusa. Ariko uyu munsi ndaboneraho umwanya wo kuvuga bimwe ntabinyura hejuru.

Aha duhuriye I Murambi hafite amateka. Isibye amatela yo kuba barahakoreye jenocide bakica abantu kubera ari abatutsi, uretse ko byari bisanzwe mu mateka ko abatutsi bagomba gupfa.

Ni ibya kera kuko bamwe muri twe kera tukiri abana batoya muri za 60 nyine, bihereye muri za 59, hari abashoboye kwambuka imipaka baba impunzi abandi batabishoboye baricwa, ariko ayo ni amateka yacu.

Ntabwo ubu ari amateka ya mbere y’abantu bacika kw’icumu, ahubwo ni uko ubu ariyo yarushijeho kuba mabi urebye uko byabaye n’umubare. Byari bisanzwe rero.

Ariko hano I Murambi icyo mvugira ko hafite amateka byabaye na ngombwa ko tuza kuhibukira aya mateka yacu mabi. Hafite n’ikindi kimenyetso. Hafite ikimenyetso cy’uko hagaragarira gutsindwa n’icyaha kw’abantu benshi. Icyo cyaha cyatumye jenocide iba, amateka mabi.

Aha hari byinshi bigaragaza uko gutsindwa kw’abantu benshi. Abo Bantu benshi ni abahe. Abo Bantu benshi mvuga; reka mpere ku banyarwanda twebwe ubwacu. Ni ikimenyetso cy’uko abanyarwanda twananiwe, twatsinzwe tugatsindwa n’icyaha. Icyaha cya politike mbi; icyaha cyatumye jenocide iba.

Uhereye kuri leta, leta yari iriho icyo gihe; abayobozi b’igihugu ku nzego zose bariho icyo gihe; batumye jenocide iba; bayigizemo uruhari, kuva na kera bamwe muri bo bashyigikiye iyo politike mbi. Hari ikimenyetso hano cy’uko gutsindwa.

Hari ikimenyetso cyo kutsindwa n’icyo cyaha no ku zindi nzego zose zitari inzego z’ubutegetsi bw’igihugu gusa. Indego zaba iz’amadini, imiryango isanzwe y’abanyarwanda; ahangaha hari icyaha.

Reka mbaze mvuge kuri icyo cy’abanyarwanda muri twebwe. Iby’inzego z’imiyoborere, inzego za politike, zo rwose, icyaha ni cyo turwana nacyo kukirandura no gukosora ibitaragenze neza. Ariko icyo cyaha kirahari.

Ku by’amadini, abakorera kwigisha abantu kubana, abakorera kwigisha ijambo ry’imana. Nabo hari icyaha cyo gutsindwa n’ibyateye jenocide. Ariko ibyo byose, noneho no kuri buri muryango nyarwanda waratsinzwe.

Twabigenza dute rero kugirango duhindure aya mateka kuko ni nacyo dukwiriye kuba twibuka ahangaha usibye kwibuka abacu bahaguye batagira umubare bazize ubusa; tuba dukwiriye noneho kwibaza icyakorwa kugirango ayo mateka tuyandure n’iyo politike tuyirandure.

Ntabwo byashoboka twebwe ubwacu tutisuzumye. Kugirango umuyobozi uwo ariwe wese, kugirango abakuriye ayo madini bigishe abantu kubana, bigishe ijamabo ry’imana, bigishe ibyiza, kugirango bihinduke ni uko nabo bisuzuma. Abantu bakareka guhora badashaka kumva ubabwira ko hari icyaha bakoze; hari integer nke bagize kandi byarabaye.

Uvuze umupasitoro wagize nabi; uvuze umupadiri wagize nabi; uvuze umusenyeri wagize; ubwo icyo gihe abantu basubira inyuma bakavuga ko wakoze ishyano wavuze amadini. Iyo uvuze Sheh wagize nabi, abantu bakavuga ko wakoze ishyano wavuze amadini.

Ariko ku rundi ruhande, abantu bakaba batubwira bati ariko ni byo. Ntabwo ari amadini yagize nabi. Reka tuvuge ko aribyo. Bati ni abantu bagize nabi. Ariko abo bantu iyo bavuzweho kuki ugaruka ukavuga ngo bavuze idini nabi kandi bavugaga ba bantu. Aho ubushakiye uravuga uti idini muri rusange nta cyaha ryakoze. Aho nemeranijwe nawe.

Kuki iyo bavuze uwagize nabi noneho ku giti cye ubihindura ko bavuze idini. Ibyo nabyo ni icyaha. Ni icyaha kandi kizababuza uburenganzira bwo guhagarara imbere y’abantu ngo mubigishe kuko nta byo mufite mubigisha igihe muhakana ibi bintu. Umuntu ukoresha ukuri yari akwiye kwemera aho icyaha kiri, agakora kugirango ahubwo kitazongera kuba. 

Ni nabyo batwigisha. Mu magambo gusa. Ibyo barabizi iyo babitwigisha. Ariko mu ngiro, bikababera ikibazo. Mureke rero, kugirango duhindure u Rwanda twubake u Rwanda rushya rwacu rw’ejo, rw’abanyarwanda bose bakwiye kuba barimo, tureke gutwikira ibintu ngo twigire abere aho tutari abere. Ni bwo byahinduka gusa.

Naho ibindi bizaba ari ukugumana ibirarane tugomba kuzishyura ; gutegereza icyo tuzakora kuko tugomba kwisyura uyu mwenda dufitiye abanyarwanda ; dufitiye igihugu cyacu ku bijyanye n’amateka yacu.

Aha na none ntabwo hagarukira ku banyarwanda gusa. Ikiza cya Murambi, ntabwo bigarukira ku banyarwanda twebwe gusa icyaha twakoze. Dukwiye kuba twicuza, dukwiye kuba duhindura imico yacu kigirango duhindura aya mateka. Aha I Murambi hagararira gutsindwa n’icyaha cya jenocide n’amahanga. Amahanga yaratsinzwe.

Amahanga yagize uruhari murijenocide y’u Rwanda. Amahanga ntabwo yagize uruhare gusa mu mateka yatumye jenocide iba, Amahanga muri yo hari abakoze jenocide rwose barayikora nk’abanyarwanda uko twayikoze. Usibye kubitera, baranabikoze.

Abo nabo, inama ni nkiyo nagiraga abanayarwand. Abo nabo, inama na’abagira ni nk’iyo nagiraga abanyarwanda. Kwemera icyaha noneho tugatera intambwe tugahindura ntitube twasubire mu byo twakoze, ari mu Rwanda, abo banyamahanga batazanabikora n’ahandi. 

Na none kugirango amahanga ajye ahora atwikira ibintu, ashaka uko yakwivana mu cyaha, akaba arcyo ayomahanga ashyira imbere, ayo mahanga akwiye kwemera icyaha akakicuza, akagisabira abanyarwanda imbabazi.

Ikibigaragaza ni iki? Ikibigaragaza ni byinshi. Hari ibyo batubwiraga abari bari hano I Murambi.Gukinira ku mva z’abantu z’abantu bishwe muri jenocide, ukabakiniraho umupira ukabakiniraho volley ball, ntabwo ari icyo gusa…ntabwo aro volley ball bivuze.

Bivuze ikintu kini cyane. Bivuze kwerekana ko icya mbere cyabazanye aho ni ikindi. Ntabwo cyari ugukiza abantu nkuko bavugaga ko bagomba gukiza abantu, ahubwo ni ukubica. Icya kabiri ni ukwerekana ko ubuzima bw’abo Bantu bakinirira hejuru nta gaciro bufite. Ariko abo Bantu bakinira hejuru ntabwo ari ba bandi gusa barimo, ni abanyarwanda twese.

Bariya Bantu bari muri iriya mva, abantu bakinira hejuru ntabwo ari uriya mubare w’abantu barimo gusa. Ni ukuvuga ngo barakinira ku buzima bw’abanyarwanda twese. Ni ukwerekana ko ariko gaciro baduha, ko nta gaciro dufite. Byatera imbere ibyo nabyo bakumva ko bidahagije.

Abongabo bakinira hejuru y’ubuzima bw’abanyarwanda, kakinira ku mva z’abo bamaze kwica cyangwa kwicisha, za politike yabo imaze kwica cyangwa kwicisha bagasubira inyuma noneho akaba aribo bashaka gucira abanyarwanda bishe urubanza.

Bagashaka kubacira urubanza bakavuga ko aribo bisho abo bamaze kwica, kandi barangiza bagashaka kubacira urubanza. Bakabacira urubanza no mu buryo butari bwo. Kuko, bo, abo banyamahanga bafite urwo ruhari, nibo bashaka kuba abagenzacyaha, bakongera bakaba abashinjacyaha, bakongera bakaba abacamanza mu rubanza rumwe.

Bazica nibarangiza bacire urubanza victims, abo bamaze kwica. Abo banyamahanga bumva ko bafite ubwo burenganzira. Niyo mpamvu abari aha muri zone Turquoise y’abafaransa n’abandi bari bafatanije n’abo; ibyo abanyarwanda batubwiraga bari hano, ni ubuzima babayemo, ntabwo ari inkuru bumvise.

Ibyo uko abafaransa baje hano muri Turquoise baje gushyigikira interahamwe nkuko banazishyigikiye na mbere zijya kwica n’uko baziremye bakazigisha, barangiza bakaziha intwaro, barangiza aho zigenda zineshwa bakaza kuziterara inkunga, kuzifasha kuzirwanirira, gufasha kwica abanyarwanda, ntabwo ari ibanga.

Nta n’ubwo ari impuha. Ariko ngo ubivuze, aba akoze icyaha. Bati difute urutonde rw’abanyarwanda tugomba gucira urubanza, bahanuye indege.  Mu ndege harimo iki kigomba kwica abanyarwanda miliyoni? Muri iyo ndege abafaransa bari babitsemo iki kigomba kwica miliyoni y’abanyarwanda? Abafaransa bagira bate uburenganzira bwo kuvuga ngo baracira abanyarwanda urubanza? N’indege bakagenda bakayishyira kuri jenocide. Jenocide hano I Murambi, hano muri icyahoze ari Gikongoro, hano muri iyi Ntara y’amajyepfo, jenocide, kwica abatutsi byatangiye muri 59. Muri 59 n’iriya ndege bavuga yahanuwe ishobora kuba yari itariyakorwa itarajya no muri factory; ntaho bihuriye.

Abo bavuga bashaka gucira urubanza, ni victims ya politike yabo mbi; y’abo bafaransa n’abo bafatanije nabo bahinduye u Rwanda bakaruhindura uko rwabaye.

Abo bavuga bashaka gucira urubanza nibo barwanije politike yabo mbi yagize u Rwanda uko rwabaye; yatumye jenocide iba mu Rwanda. Ariko amahanga agahagarara ngo azacira abantu urubanza, urubanza rwo gukora iki? Babifitiye burenganzira ki? Ntabwo bishoboka kuko ataribyo, nta n’ubwo ari byo.

Ikijya kimbabaza ni kimwe. Icyo ndegreta ni kimwe. Ibihe byahindutse vuba abicaga umuntu atahashyije bihagije. Icyo nicyo cyaha numva nfite. Ntitwashoboye gukora ibihagije; kugirango abicaga, kuko n’aba bicaga bari aha muri Turquoise bagiye tutabonanye; tudahuye nabo. Umuntu yajyaga kubamariramo rwose umujinya, bakagira icyo bajyana bavanye mu Rwanda.

Na bariya bandi baducitse bakambuka ubu bakaba bagaruka tukabakira neza kongera kuba mu banyarwanda, ikijya kimbabaza, ntabwo twabonye umwanya wo kugirango bamwe be kugera aho bajyaga. Icyo rwose ndakivuga aha kumugaragaro, nicyo kimbabaza. Kumara kwica warangiza ugacika, ukagenda noneho hakazaba n’abaza kukuburanira ngo na RPF nayo ngo yarishe yishe abantu? Yishe abahe se?  Miliyoni zikarinda zambuka zimaze kwica?   RPF yishe abahe. RPF igira neza gusa. Cyangwa yararangaye sinzi.

Ariko ngirango ni uko ubushobozi bwari buhari butari buhagije. Ngirango ntitwajyaga gukora buri kintu cyose uko gishoboka. Niyo mpamvu nsubira inyuma nkicuza. Umutima wo twari tuwufite wo guhagarika ibyabaga. Ariko ubushobozi bubikora ku buryo buhagije, ku buryo twashoboraga kurengera abantu bapfaga aho gupfa miliyoni imwe iyo dushobora gukiza abantu ibihumbi magana angahe kubera ko twashoboye gukora ibishoboka iyo tuza kugira ubwo bushobozi, nicyo cyajyaga kunshimisha.

Jye rero nicyo kimbabaza gusa. Naho ibindi, abavuga ubusa birirwa bavuga nyine, ntacyo bahindura kuri ayo mateka. Nta n’ubwo bakwiriye kujya bahindura amateka ngo bayavuge uko atari.

RPF? RPF ahubwo yari ikwiriye kubacira urubanza n’abishe abantu n’ababashyigikiye. Niyo ikwiriye kuba ihagarara ahantu igacira abantu urubanza. Ntabwo yo kuyicira urubanza bishoboka. Ntabwo bishoboka. Nta nubwo bifite n’aho bishingiye.

Ariko uwo mwenda ni wo numva nfite. Ntabwo twakoze ibihagije kuko ntitwari dufite ibihagije bituma tubikora. Ariko ubu noneho, uwabisubira bwo byagorana rwose. N’ubu nabasubira bakabikora nk’abo b’imbwa nyina nabo birirwa bambika imbwa ibintuza n’abo aba ari imbwa.

Urumva ni ibintu umuntu umwe agira atya akihisha akica umuntu. Ariko politike yakongera kubigira gutyo, bikajyamo abantu babyitabira kubikora, icyo gihe bwo icyo tutakoze kiriya gihe bwo kizakorwa. Kurwanya ikibi wihanukiriye nta cyaha kirimo na busa.

Ibihe byarahindutse rero, byahindutse vuba, bidushyira mu kindi gihe ugarura umuntu ukamukarabya ukamwambika yarangiza akakunyura inyuma akajya kugusenyera cyangwa akajya kukuvuga nabi. Ubwo ni ibyo bihe tugezemo. Niyo politike y’isi tugezemo.

Ariko, abo ngabo mujya mwumva, numvaga bavuga Bruguière niba ari Bruguière nta kirimo nta na busa. Nta kintu kimurimo. N’abo akorera, n’iki…bafite icyo cyaha. Icyaha bafite cya jenocide hano mu Rwanda ahubwo nicyo kizabagirira nabi, kizabagaruka. Abo bavugaga Peraudin, bande…, abo bose nyine baraducitse baragiye nta kibazo. Ariko nta bazagaruka. Ubwo rero ayo mateka ya hano ni uko amaze.

Abo banyamahanga …abanyamahanga bakongera bagakoresha noneho n’abanyarwanda. Abanyarwanda bamwe bagitekereza nabi cyangwa batekereza nabi kubera ko bakoreshwa.

Ikindi nasabaga n’uko n’abo banyamahanga batajya, amateka y’u Rwanda bareke kuyajyamo ngo bayatobange bayagire uko bashatse. Twe kunabibaha natwe, twe kubibemera ko biba.

Ngirango nabwo iyo ubona abanyarwanda bamwe badafite amateka ayo ariyo yose, badafite n’icyo bakoze, abanyamahanga bakajya kubagira ngo ni intwari, intwari zo muri jenocide. Jyewe ndacyategereje kugeza na n’uyu munsi abantu bagirwa intwari n’abo banyamahanga bavuga ko ari intwari muri jenocide, ndashaka kumenya umuntu n’umwe bakijije ntabwo ndamumenya n’umwe.

Nabo kandi urababaza ngo bazi ko gusa bakijije abantu, bagafata umuntu ngo Rusesabagina usigaye ujya hanze wiriwa…igisambo akorana n’ibindi bisambo, ibisambo bimushyigikira, birirwa bavuga ko ibintu bigiye gucika mu Rwanda, ngo habayeho jenocide y’abatutsi ngo ubu hari hafi gukurikiraho iy’abahutu.

Uwo ni Rusesabagina. Ariko ntabwo ari Rusesabagina buriya, ni abamukoresha. Ni igikoresho cy’abantu bahora bashaka guhindura amateka y’u Rwanda bakayagira ku buryo babona aho bihisha icyaha bafitiye u Rwanda, icyaha bakoreye u Rwanda.

Ubutwari bw’abanyarwanda bareke abanyarwanda babuvuge…hariya yatubwiraga umuntu wamukijije, akamugemurira, akamuhisha byamunanira akamugira inama uko yagenda, uwo ko tumuzi ko tumuzi ko bamutubwiye, abandi bo bababwiwe na nde?

Abo banyamahanga rwose ndabasaba ko bajya bareka kujya batuvangavangira bagatatobanga amateka y’u Rwanda. Uruhari bayagiyemo rwo kuyangiza birahagije bikongera no kuyatobatoba ku buryo bundi.

Ariko nkuko abanyarwanda twanze gupfira gushira, nkuko na jenocide itaje ngo irangize abanyarwanda, ni nako hari abo banyarwanda bagifite imico mibi na politike mbi ijyanye na jenocide; niko nabwira n’abo banyamahanga birirwa bakina imikino iraho bakinisha abanyarwanda badusubiza inyuma, ko rwose gahunda yo gushaka kubaka u Rwanda rushya, yo kuruteza imbere, yo gushaka ko abanyarwanda bariho batapfuye bakomeze babeho, iyo ngiyo yo ntabwo isubira inyuma kandi twiteguye no kurwana urwo rugamba nkuko twarwanye n’urwa jenocide.

Urwa jenocide rwo n’ubwo tutakoze ibihagije kuko tutari tubishoye, ubu bwo tuzakora ibihagije. Kandi twiteguye kurwana urwo rugamba n’ushaka kurushoza uwo ariwe wese mu buryo dufite ubwo aribwo bwose. Kuko kutabikora ni icyaha. Kandi kutabikora, kutarwanira igihugu, kutarwanira ukuri kwawe ugomba kugira, ngirango ingaruka zabyo ni zo mbi cyane kurusha kubyemera ngo undi abiguhe aho abishakiye; aguhe ibindi ashaka bitari ukuri; bitari uburenganzira bwawe; nkuko abantu n’ubundi bakwiye kuba bariho.

Nagirango nsubiremo rero gusaba abacitse kw’icumu, ko bajya bakomeza kwihangana. Bajye bakomeza kwihangana kuko tunabasaba na byinshi birenze ibyo twari dukwiye kuba dunabasaba, byinshi birenze ibyo dusaba abandi.

Abandi se…cyane cyane nk’abishe bo, twabasaba iki? Abatumye iyi politike ibaho bakanayikoresha bakica abantu bo ntidufite icyo twabasaba kuko ntacyo bafite.

Niyo mpamvu tugaruka kubacitse kw’icumu tukaba aribo tugisaba kuko aribo bagifite. Icyo bafite ni iki? Bashobora gutanga izo mbabazi. Ntibibagirwe gusa, twese ntitwibagirwe ariko izo mbabazi bakazitanga kuko nibo bazifite. None se abishe bo twabasaba iki? Ntacyo bafite. Ntacyo bafite twabasaba. Nta kintu kizima bafite twabasaba usibye ko tubasaba kugishaka gusa, icyo kizima bagira muri bo kugirango igihugu gishobore kubaho.

Hanyuma, ibibazo byo byavuzwe birazwi; biriho ariko niko tuzajya dukomeza gushaka uko byakemuka; tuzajya dukoresha uburyo ubwo aribwo bwose mu bishoboka. Rimwe, tugafatanya ndetse no muri ariya mahanga aba arimo abadafite uruhari muri aya mateka kandi bumva n’ikibazo; bafasha u Rwanda; bafatanya n’u Rwanda.

Ibyo bihugu by’amahanga turabishimira ko hari ibyo bidufasha, tukanifuza ko byakomeza gufasha kugirango noneho tubone no gufasha n’abacitse kw’icumu no gufasha n’abanyarwanda muri rusange kugira ngo igihugu gishobore gutera imbere.

Ibyo, tuzakora igishoboka cyose dutere intambwe uko tugenda dutera intambwe (ntibyumvikana neza, ariko ndumva ari “hari imikorere”) y’abantu, hari n’abantu badakora neza rimwe na rimwe ariko bitajya muri iyo mikorere ya jenocide; ari imikorere mibi gusa isanzwe, umuntu agahora akosora; ahana; akurikirana kugirango dushobore gutera imbere.

Ibyo ngirango nibyo tuzakomeza gushyigikira no kugirango u Rwanda rwongere rubeho; abanyarwanda bongere babeho kandi barusheho no kubaho neza batera imbere.

Nagirango rero nsoreze ahangaha nsaba abanyarwanda bose ko bakomeza kwihangana, kandi bagakomeza gushaka gukora. Gukora; kwiteza imbere; gukorera igihugu cyabo no guhangana n’ibi bibazo. Ibi bibazo biriho ntitubitinye duhangane nabyo. Nta mpamvu. Mwahungira hehe se ibibazo? Ibibazo dufite abanyarwanda babihungira hehe usibye guhangana nabyo.

Kandi ndibwira ko harimo abanyarwanda benshi biteguye guhangana nabyo; tukabikemura, bishingiye ku kuri; ku majyambere; ku miyoborere myiza; ku mibereho myiza y’abanyarwanda n’uburyo bagira uburenganzira busesuye.

Murakoze

Ijambo Perezida Paul Kagame yavugiye i Murambi taliki 7 Mata, 2007.

Pour être informé des derniers articles, inscrivez vous :

Commenter cet article

tfr 09/08/2017 09:47

gerard karangwa Disikuru y'i Murambi iratanya abanyarwanda ibenyegezamo
amacakubiri.

Ijambo Perezida Pawulo Kagame yavugiye i Murambi tariki ya 07
mata 2007 mu mihango yo kwibuka genocide yo muri 1994 ku nshuro ya
13 ryakuruye impaka ndende mu banyarwanda nk'uko byagaragariye kuri
izi mbuga za internet abatari bake bakunze kunguraniraho
ibitekerezo.

Hari abataritinzeho cyane kubera kumenyera imvugo Perezida
Kagame asanganywe irangwa n'umwaga mwinshi uvanze n'umujinya. Hakaba
n'abaryumvisemo ubukana budasanzwe n'ubushake bwo kwenyegeza
amacakubiri asanzwe agaragara hagati y'abanyarwanda ndetse bamwe
bagize n'icyo barivugaho.

Twe turi muri abo ba kabiri nk'uko tutazuyaje kubigaragariza mu
itangazo rya Partenariat-Intwari ryasohotse tariki ya 08 mata 2007.
Muri iryo tangazo twaratuye tuvuga ko discours ya Perezida Kagame
yibutsa iya Mugesera Léon igihe yahamagariraga abahutu kunyuza
abatutsi mu nzira y'ubusamo ngo babasubize muri Abisiniya iyo bavuye!

Hari abanenze itangazo ryacu bavuga ko twabeshyeye Perezida
Kagame kuko ngo ntaho yigeze ahamagarira abatutsi kwica abahutu.
Nyamara disikuru ya Perezida Kagame irasobanutse bihagije. Ntaho
yahishe abanyarwanda ndetse n'amahanga ejo ntazabeshye ngo
ntiyayaburiye.

Nk'uko twabivuze rero kandi n'ubu turabisubiramo ndetse
tubitsindagire, ijambo rya Perezida Kagame ryari ryuzuye umujinya,
inzika n'iterabwoba.

Umujinya n'inzika byo nyirubwite yarabyigaragarije aho agira
ati : ''... Ikijya kimbabaza ni kimwe. Icyo 'ndegreta' ni kimwe.
Ibihe byahindutse vuba abicaga umuntu atabahashyije bihagije. Icyo
ni cyo cyaha numva mfite. Ntitwashoboye gukora ibihagije kugira ngo
abicaga, kuko n'aba bicaga bari aha muri Turquoise bagiye
tutabonanye, tudahuye na bo. Umuntu yajyaga kubamariramo rwose
umujinya bakagira icyo bajyana bavanye mu Rwanda''.

Ku waba agishidikanya ku bo Perezida Kagame yashakaga kuvuga,
amagambo akurikira yagombye kumumara amatsiko. Aragira ati : ''Na
bariya bandi baducitse bakambuka ubu bakaba bagaruka tukabakira
neza..., ikijya kimbabaza nta bwo twabonye umwanya wo kugira ngo
bamwe be kugera aho bajyaga. Icyo rwose ndakivuga ku mugaragaro ni
cyo kimbabaza. ... Miliyoni zikarinda zambuka zimaze kwica? ...''.

Kuri Perezida Kagame, ''miliyoni'' z'abanyarwanda bahunze muri
1994 bose ni abicanyi bagombaga kubuzwa kugera iyo bahungiraga iyo
biza kumushobokera. Iyo amagambo akarishye nk'aya ajya gusohoka mu
kanwa k'umutegetsi cyane cyane nk'Umukuru w'igihugu, ibintu biba
bigeze iwa Ndabaga. Igitangaje ahubwo ni ukubona abenshi mu bavuga
ko bakora politiki bumva amagambo nk'aya bakaruca bakarumira. Iyaba
mu Rwanda hahumekwaga ituze n'ubwisanzure, amagambo ya Perezida
Kagame yakabaye yaramaganiwe mu gihugu imbere. Ariko tuzi neza ko mu
Rwanda rwa FPR bitoroshye n'ubwo bishobora kutazatinda gushoboka.
Nta mu minisitiri n'umwe, nta mudepite cyangwa undi muyobozi
watinyutse kugaragaza mu buryo ubwo ari bwo bwose ko adashyigikiye
imvugo rutwitsi yakoreshejwe na Perezida Kagame.

Nyamara abanyarwanda basanzwe baratabaje biratinda. Batabaje
bisunze uburyo bunyuranye bw'itumanaho nka telefone mobile na
internet. Hafi ya bose icyo bahurizagaho ni uko basangaga amagambo
ya Perezida wa Republika akungurira igihugu n'abagituye. Icyo hafi
ya bose basabaga ni uko ababishoboye bose bakwamagana ayo magambo
kandi bakagerageza guhumuriza abanyarwanda kuko basanga Umukuru
w'igihugu wakagombye kubikora dore ko ari na yo nshingano ye nkuru,
yitwara nk'uwayiteye umugongo.

Imvugo ya Perezida Kagame ni gateranyamiryango kandi inyuranye
bikomeye na politiki y'ubumwe n'ubwiyunge mu banyarwanda atahwemye
gushyira imbere mu magambo, ayamamariza muri Komisiyo yabyitiriwe no
mu zindi nzego zinyuranye z'ubutegetsi bwe. Amagambo nk'ayavugiwe i
Murambi yabangikana ate n'inama za buri mwaka zisingiza ubumwe
n'ubwiyunge kimwe n'imihango irata ubusabane? Disikuru y'i Murambi
yumvikana ite nyuma y'amezi make cyane i Kigali hateraniye inama
yiswe iy'umushyikirano?

Perezida Kagame yarongeye ati : ''... Ariko nk'uko abanyarwanda
twanze gupfira gushira, nk'uko na genocide itaje ngo irangize
abanyarwanda, ni na ko hari abo banyarwanda bagifite imico mibi na
politike mbi ijyanye na genocide, ni ko nabwira n'abo banyamahanga
birirwa bakina imikino iraho bakinisha abanyarwanda badusubiza
inyuma, ko rwose gahunda yo gushaka kubaka u Rwanda rushya, yo
kuruteza imbere, yo gushaka ko abanyarwanda bariho batapfuye
bakomeza bakabaho, iyo ngiyo yo nta bwo isubira inyuma kandi
twiteguye no kurwana urwo rugamba nk'uko twarwanye n'urwa genocide''.

''Urugamba'' Perezida Kagame yiteze ni uruhe? Ni
uruhe ''rugamba'' rumuhangayikishije ku buryo agera n'aho
atsindagira imvugo ye agira ati : ''Urwa genocide rwo n'ubwo
tutakoze ibihagije kuko tutari tubishoboye, ubu bwo tuzakora
ibihagije. Kandi twiteguye kurwana urwo rugamba n'ushaka kurushoza
uwo ari we wese mu buryo dufite ubwo ari bwo bwose''.

Ubusanzwe ko iyo abarokotse batakambiraga Leta bayisaba
umutekano, ubutegetsi bwabasubizaga ko ntawabona abasirikare bo
kurinda buri rugo, ubu noneho barabonetse? Twongeye gusaba
abanyarwanda aho bari hose ngo bahumuke maze bime amatwi ababashuka
bose kandi bitandukanye n'igikorwa icyo ari cyo cyose gishobora kuba
urwitwazo rwo gusubiza u Rwanda n'abanyarwanda mu ntambara cyangwa
andi marorerwa.

Urwo ''rugamba'' Perezida Kagame yiteguye kurwana akaba
arushishikariza abanyarwanda ni uruhe koko? Mu by'ukuri, n'ubwo mu
gutangira ijambo rye Perezida Kagame yemezaga ko atari buce ibibazo
hejuru, aha asa n'uwirinze gutobora ngo abwire abanyarwanda kimwe mu
bibazo by'ingutu bibugarije. Perezida Kagame yirinze kwerurira
abanyarwanda ko nyuma y'imyaka 13 FPR ifashe ubutegetsi ku ngufu,
ikibazo cy'impunzi z'abanyarwanda kikiri cyose. Yirinze kubabwiza
ukuri ku mpungenge atewe n'ikibazo cy'abarwanyi ba FDLR bakiri mu
gihugu cya Kongo n'abandi babarizwa mu bindi bihugu nka Uganda.
Yirinze kubabwira ibibazo aterwa n'abanyapolitiki batavuga rumwe na
we bakomeje kumwotsa igitutu aho bakorera mu bihugu by'amahanga.

Kubera akamenyero ko gushakira ibisubizo by'ibibazo byose ahura
na byo mu nzira z'intambara, Perezida Kagame yirinze kwemerera
abanyarwanda ku mugaragaro ko nta ntambara ijya irangiza ibibazo bya
politiki. Perezida Kagame amaze kubona neza ko ibyo bibazo
byamurenze kandi nta yindi turufu afite usibye iy'intambara. None
rero aragerageza kuyihembera akoresheje disikuru zibyutsa
amarangamutima y'abashenguwe n'agahinda kubera amahano yashenye u
Rwanda maze aho kubahoza no kubahumuriza akabasezeranya kubasubiza
mu ntambara! Kagame asanze disikuru ye y'i Murambi isa nk'aho
itakiriwe uko yari abyiteze none ati reka nyikomereze mu nzego
z'ubutegetsi mpereye mu ntara. Ubu nta kindi yamamaza kitari
intambara ngo yugarije u Rwanda. Harya ubundi u Rwanda rugira
uwuhe ''mwanzi'' utari abanyarwanda?

Ibi Kagame na FPR bakomeje gukora byitwa kuba abategetsi gito.
Baritwara nk'abagambirye guhirimana n'igihugu cyose. Nk'ubu koko, za
nkirirahato z'abacitse ku icumu zizabangikanya zite disikuru y'i
Murambi n'imwe yabategekaga ''gufungira sentimenti zabo mu kabati''?

Iyi murabe maso biracitse iturutse i bukuru nta kindi ihatse
usibye guteranya abanyarwanda. N'ubundi ngo ibijya gucika bica
amarenga. Perezida Kagame yarondoye abatsinzwe n'icyaha cya genocide
maze avuga abanyarwanda muri rusange, abanyarwanda nka Leta,
abanyamadini ataretse n'abanyamahanga. Nyamara n'ubwo akomeje
kwishyira heza, mu batsinzwe arimo kuko na n'ubu agishakira umuti mu
ntambara, mu ''gukora ibihagije'', mu kwirinda ko ''miliyoni
zaducika'' no mu bindi biganisha ku bwicanyi bwa genocide bwasize u
Rwanda n'abanyarwanda iheruheru.

Perezida Kagame na FPR bazasaba abanyarwanda imbabazi ryari?

Muri disikuru ye, hari aho Perezida Kagame yagize ati : ''Aha i
Murambi hagaragarira gutsindwa n'icyaha cya genocide n'amahanga.
Amahanga yaratsinzwe. Amahanga yagize uruhare muri genocide y'u
Rwanda. Amahanga ntabwo yagize gusa uruhare mu mateka yatumye
genocide iba, amahanga muri yo hari abakoze genocide rwose
barayikora nk'abanyarwanda uko twayikoze. Usibye kubitera,
baranabikoze. Abo na bo inama nabagira ni nk'iyo nagiraga
abanyarwanda. Kwemera icyaha noneho tugatera intambwe tugahindura
ntitube twasubira mu byo twakoze, ari mu Rwanda, abo banyamahanga
batazanabikora n'ahandi. ... ayo mahanga akwiye kwemera icyaha
akakicuza, akagisabira abanyarwanda imbabazi...''.

Perezida Kagame iyo avuga genocide yo muri 1994, yibagirwa ko
iyo genocide yabimburiwe n'intambara yiswe iy'ukwakira. Yakwibagiza
ate ko iyo ntambara yari ihanganishije Leta ya MRND n'ingabo za FPR-
Inkotanyi yari arangaje imbere? Kuki iteka yirengagiza uruhare rwe
bwite n'ingabo yari ayoboye muri iyo ntambara yaje gusozwa na
genocide n'ihunga rya Leta bari bahanganye?

Nyamara ibimenyetso simusiga bimushinja ubwe na bamwe mu bafasha
be bimaze kuba byinshi cyane ku buryo bizabagora gukomeza kwigira
miseke igoroye. Kuba amahanga akwiye gusaba abanyarwanda imbabazi ni
byo koko kandi birakwiye. Ariko ni ngombwa kumenya neza ayo mahanga
avugwa ayo ari yo. Ni ngombwa no kumenya abanyarwanda bavugwa abo
ari bo. Kuko nka Leta zunze ubumwe za Amerika, Ububiligi n'Umuryango
w'abibumbye basabye imbabazi. Ubu se izo mbabazi zaba zaremewe?
Uwazemeye se ko ari Leta ya FPR, ubu twakwihandagaza tukemeza
bidasubirwaho ko zemewe n'abanyarwanda mu gihe ubwabo batari
bashobora gusasa inzobe ngo bumvikane ku ruhare rwa buri wese?

Perezida Kagame na FPR bashobora bate kwemera imbabazi mu izina
ry'abanyarwanda mu gihe ubwabo batari bagira ubutwari bwo kwemera
icyabo cyaha ngo bakicuze kandi bagisabire abanyarwanda imbabazi
nk'uko Perezida Kagame abitongera abandi?

Ngo ntibishoboka gucira FPR urubanza!

Muri disikuru y'i Murambi, Perezida Kagame yiyamye akomeje
abanyamahanga bashaka kuba ''abagenzacyaha'', bakongera kandi
bakaba ''abashinjacyaha'', bakagaruka bakaba ''abacamanza''.
Ati : ''Bazica nibarangiza bacire urubanza 'victims', abo bamaze
kwica? Abo banyamahanga bumva ko bafite ubwo burenganzira.''

Nk'uko bigaragara, ibi byose byaturutse ku iperereza ryakozwe na
Juji Jean-Louis Bruguiere ku ihanurwa ry'indege yari itwaye Perezida
Habyarimana Yuvenali na mugenzi we w'Uburundi Ntaryamira Cyprien
n'abandi bari kumwe na bo barimo n'abafaransa. Igitangaje cya
Perezida Kagame ni ukuntu agerageza gupfobya ihanurwa ry'iyo ndege
bose bafata nk'imbarutso ya genocide nk'uko bikubiye mu mwanzuro
w'Umuryango w'abibumbye wemeza ko mu Rwanda habaye genocide muri
1994. Ko FPR na Perezida wayo kugeza ubu bahakana uruhare urwo ari
rwo rwose mu ihanurwa ry'iyo ndege, bashingira he bahakana isano
iryo hanurwa ryaba rifitanye na genocide? Ese ubundi ko badahwema
guhamya ko ari abere, FPR na Perezida wayo babuzwa n'iki kwemera
kuburana ngo ibintu bijye mu buryo burundu? FPR n'umukuru wayo
bashobora bate kuba ''victims'' kandi bakaba ''abacunguzi'' mu
ntambara na genocide byayogoje u Rwanda n'akarere ka Afrika
y'ibiyaga bigari?

Dosiye y'indege iranze irabahagamye

Perezida Kagame yarihandagaje kandi ati : ''Ariko abo ngabo
mujya mwumva, numvaga bavuga Bruguiere niba ari Bruguiere, nta
kirimo nta na busa. Nta kintu kimurimo. N'abo akorera, n'iki...
bafite icyo cyaha. Icyaha bafite cya genocide hano mu Rwanda ahubwo
ni cyo kizabagirira nabi, kizabagaruka....''.

Ibi ni akumiro iyo umuntu azirikanye ko abanyarwanda kimwe
n'amahanga biyumviye Perezida Kagame inshuro zitabarika ku maradiyo
anyuranye, avuga uwo mujuji w'umufaransa hanyuma i Murambi akitwara
nk'utigeze amumenya. Ibinyamakuru byo mu Rwanda n'ibyo mu mahanga
byuzuye ibiganiro bya Perezida Kagame na bimwe mu byegera bye
bigaragaza ko bazi neza uwo mujuji. Biratangaje cyane kumva Perezida
avuga ko yumvise bavuga Bruguiere none ntibiteye kabiri bamwe mu
basirikare be bakuru baregeye u Bubiligi binubira mandats z'uwo
mujuji zibashakisha.

Perezida Kagame arongera akihanukira ati : ''... Muri iyo ndege
abafaransa bari babitsemo iki kigomba kwica miliyoni y'abanyarwanda?
Abafaransa bagira bate uburenganzira bwo kuvuga ngo baracira
abanyarwanda urubanza? N'indege bakagenda bakayishyira kuri
genocide".

Mu gihe Perezida Kagame yavugaga ko ''mu ndege nta kirimo'', nta
byumweru bibiri byari bishize Leta ayoboye ifashe icyemezo cyo
gushyiraho Komisiyo y'impuguke ishinzwe guperereza ku ihanurwa
ry'iyo ndege. Aha tukaba tutabura kwibaza ''umukino'' Kagame na Leta
ye barimo. Ese mama iyo Komisiyo hari icyo yageraho kandi ba nyiri
ukuyishyiraho bakomeza gupfobya impamvu yashyiriweho? Ibi se
bitaniye he na Komisiyo Mucyo yashyizweho maze mu gihe itaratanga
imyanzuro yayo bati ducanye umubano n'Ubufaransa? Nyamara kandi
birirwa basaba iyo Leta bacanye umubano ngo ibafashe, iborohereze mu
kazi k'iyo Komisiyo. Aka si akumiro? Ibi si bimwe byo gusaba uwo
wimye?

None nk'aho ibyo bitari bihagije, bongeyeho akarusho ko kurega
Ubufaransa nka leta mu rukiko mpuzamahanga rufite icyicaro cyarwo i
La Haye mu Buholandi, ngo iyo Leta y'Ubufaransa ni yo yakoresheje wa
mujuji batazi witwa Bruguière.

Icyakora aho bukera, kwivuguruza Kagame na leta ye bahoramo
birabyarira u Rwanda n'abanyarwanda amazi nk'ibisusa.

Nyamara iki kibazo cy'indege kibangamiye Perezida Kagame
bikomeye. Ni na cyo gishobora kuba cyaramuteye kuvuga amangambure mu
rwego rwo gushimisha abantu be bashakishwa, no kumvisha abanyarwanda
ko nta cyo atinya igihe yagiraga ati : ''RPF ahubwo yari ikwiriye
kubacira urubanza n'abishe abantu n'ababashyigikiye. Ni yo ikwiriye
kuba ihagarara ahantu igacira abantu urubanza. Ntabwo yo kuyicira
urubanza bishoboka. Ntabwo bishoboka. Nta n'ubwo bifite n'aho
bishingiye....''.

Si bwo FPR isimbuye ya mahanga Perezida Kagame yaneguraga mu
kwikanyiza yigira ''umugenzacyaha, umushinjacyaha n'umucamanza''!!!
FPR yanenga iki ayo mahanga mu gihe umukuru wayo yifata ku gahanga
maze agatangariza ku mugaragaro ko ntawufite uburenganzira
n'ububasha bwo kuyicira urubanza? Ese ubundi hari inenge n'imwe FPR
ijya yemera ko ifite? Cyangwa ahubwo aho kwemera inenge iyo ari yo
yose, FPR n'umuyobozi wayo bahisemo gushora abanyarwanda mu ntambara?

Kagame yisamye yasandaye kandi dore ikibimutera

Nyuma yo kugera ku butegetsi abikesheje ''inyota y'ubutegetsi''
ndengakamere ikomeje kumuranga, hanyuma agashobora gushimangira ubwo
butegetsi abinyujije mu matora y'amahugu, Kagame yakomeje kwizera ko
ikinyoma n'uburiganya yakoresheje mu kwigarurira abanyarwanda
n'amahanga bizahoraho ubuziraherezo.

Muri uko kwiyizera gukabije, yarikanyije birenza urugero kugeza
ubwo yibagirwa abamugejeje ku ntebe y'ubutegetsi. Bamwe
yarabivuganye, abandi arabafunga, ab'amahirwe baheze ishyanga inyuma
y'u Rwanda.

Ubu rero abonye ibihe bitangiye kumuhinduka:

1. Mu ishyaka rye FPR yitangarije ko ryacitsemo ibipande;

2. Iyo FPR kandi yari yaritiranije n'abatutsi amaze
gusobanukirwa ko ari ibintu bibiri bitandukanye;

3. Cya kinyoma n'uburiganya yari yarubitse cyane cyane ku
mahanga byamushibukanye;

4. Ya miryango yajyaga yikingura akinjira yisanga hirya no hino
mu mahanga baragenda bayidadira;

5. Ya mashyaka ahanganye n'ubutegetsi bwe yakomeje gusuzugura
ayima amatwi aribonera ubwe ukuntu amaze guhinyuza imitegekere ye
akaba amwotsa igitutu uko bukeye uko bwije agamije kugamburuza FPR
ikava ku izima;

6. Yewe na bwa butabera yakomeje kwibwira ko bureba abandi gusa
bwatangiye kumusatira.

Ibi byose dusanga ari byo bimutera imyifatire irangwa
n'ubuhubutsi, umwaga, umujinya n'agasuzuguro kuri buri wese uhereye
no ku banyarwanda yagombye kubahiriza. Aha tukaba twibaza niba
abavuze ko amateka nta cyo yigisha abanyarwanda badafite ukuri.
Kimwe n'abemeza ko ingoma zisa nta cyo zipfana.

Nk'abakuru baturebeye izuba, bahanura bate ukuntu buri gihe
ubutegetsi bw'u Rwanda iyo bugeze mu marembera bwerekana ibimenyetso
bisa:

1. Mu gihe cya MDR-Parmehutu, Kayibanda Gerigori muri disikuru
ye ya nyuma ati : ''... Abo bashaka gukora coup d'Etat nibagire
bwangu bayikore turebe!''. Ibyakurikiyeho murabizi ;

2. Kuri MRND-Muvoma, Habyarimana Yuvenali ati : ''Nzambika
interahamwe zanjye ziberwe maze tumanuke!'', arongera ati : ''...
Ndi ikinani cyananiye abagome n'abagambanyi!...''. Bwarakeye ibara
riragwa ;

3. None FPR na Kagame bati : ''... Ntabwo twakoze ibihagije kuko
ntitwari dufite ibihagije bituma tubikora. Ariko ubu noneho
uwabisubira bwo byagorana rwose.... Icyo gihe bwo icyo tutakoze
kiriya gihe bwo kizakorwa...''.

Banyarwanda, abakuru n'abato, ko abwirwa benshi akumva bene yo,
ibi bihatse iki? Ubu ejo ejobundi twongeye tukagusha amahano,
tuzavuga ko tutategujwe koko? Twaretse ubunebwe bwo gutekereza no
gushishoza maze tugahagurukira rimwe tukamagana ibi bintu amazi
atari yarenga inkombe? Ubu se ko agakomye kose haregwa abafaransa
ngo baba barateguye bakanafasha abanyarwanda kumara bene wabo,
abigerera i kambere mwatubwira abanyamahanga baba bari inyuma y'uyu
mugambi wa Kagame na FPR ye?

Icyo dusaba
Hari byinshi byavugwa kuri disikuru y'i Murambi. Ariko reka
dusoze twongera guhamagarira abanyarwanda kurushaho gushishoza
kugira ngo batagwa mu mutego w'abagamije kubashora mu ntambara
zidashobora kugira inyungu n'imwe zibazanira usibye kubasubiza mu
marorerwa mu gihe batari bakira n'ingaruka z'aya mbere.

Turahamagarira Perezida Kagame na FPR kureka kwitiranya inyungu
zabo bwite n'inyungu z'u Rwanda. Nta gitangaza kirimo kuba umukuru
w'igihugu cyangwa se undi mutegetsi wo mu rwego rwo hejuru
bakurikiranwa n'ubutabera kubera ibyaha bakekwaho. Gukurikirana
Kagame na bamwe mu bafasha be kandi ntibyakagomye gufatwa
nk'ubushake bwo gusagarira u Rwanda nk'igihugu. Ni yo mpamvu twagira
inama FPR na Perezida wayo ngo bashyire mu gaciro bareke ukuri kose
ku mahano yo mu Rwanda no mu karere ka Afrika y'ibiyaga bigari
gushyirwe ahagaragara.

Turasaba FPR n'Umuyobozi wayo gucika burundu ku ngeso zabo zo
guteranya abanyarwanda no kubenyegezamo amacakubiri n'inzangano
bibasanzwemo. Tubasabye dukomeje kwirinda agashinyaguro gahoza
abacitse ku icumu ku nkeke babatoneka uko bukeye uko bwije kandi nta
bushake n'imigambi ihamye FPR yigeze igaragaza mu kubacyemurira
ibibazo. Uretse gushinyagura, wasobanura ute ukuntu
wicuza ''miliyoni zagucitse'' mu gihe abiyemerera ibyaha bakoze
ubarekura ubutitsa, naho abere ukabaheza mu munyururu?

Ku rundi ruhande, wahamagarira ute abanyarwanda kuyoboka
ubutegetsi bwawe mu gihe n'abari babuhunze hanyuma bagataha ubahoza
ku nkeke ubacyurira ari na ko ubacunaguza ngo : ''... Na bariya
bandi baducitse bakambuka ubu bakaba bagaruka tukabakira neza
kongera kuba mu banyarwanda...'' nk'aho badataha mu gihugu cyabo
cyangwa ngo babe ari abanyarwanda. Kuba umunyacyaha icyo ari cyo
cyose n'uburemere gifite ubwo ari bwo bwose, ntibivutsa nyiri icyaha
ubwenegihugu bwe igihe cyose ataracirwa urubanza ngo icyaha kimuhame.

Turasaba Leta ya FPR kwihutira gufungura urubuga rwa demokarasi
mu Rwanda kugira ngo abanyarwanda baganire kuko ari yo nzira yonyine
kandi iboneye yo kubahumuriza no kurandura burundu imizi ya kimwe mu
bibazo by'insobe nk'ubuhunzi bwokamye abanyarwanda. Ni na bwo buryo
bwiza kandi budahenze bwo kubungabunga umutekano n'amahoro mu
banyarwanda no kubabibamo ubumwe n'ubwiyunge, byo soko y'ubusabane
nyakuri. Byongeye kandi, ni yo nzira yonyine yo kwiyunga hagati y'u
Rwanda n'ibihugu by'abaturanyi, ubwo bwiyunge bukaba isoko ikomeye
y'ubutwererane buhamye muri Afrika y'ibiyaga bigari ndetse no mu
rwego rw'Afrika yose.

Dusabye abakora politiki bose guhagurukana umurava bakamaganira
kure disikuru zose zitanya abanyarwanda maze bagashyira imbere
urukundo rw'igihugu cyabo kandi bakihatira kumurikira abanyarwanda
bababera urugero rw'ubwitange mu myifatire no mu mikorere yabo ya
buri munsi.